John 16
1naaémba kesááiyaveꞋa íma asiramái méꞋa siyúwáavo séꞋa mináímbá kwésimatimunda imáyáa oró. 2naaémba marapá-kwáásímó keinárawatavesamo monoꞋ-náúmpákémbá kwatuwánáemo sénááomba mindáyavesa sésa Ísuna kwayó-kwáásí tínkamiyawai Áánútuna mayáímá kwémayaawe kampaꞋá sénááowe. 3kenté kesivonté íma suwánaamba pósa miráumai sáwíꞋa umátinkanaaowe. 4ívéꞋa mináímbá kwésimatimunda póna mindá paárínaꞋa táákaꞋa maréꞋa séꞋa simásimakaimba kwévaariye sénááowe. mindáyaveꞋa kwésimatimune Ísu siráiye.Áánútun-amanko mayáímá kwémayain-kwasai.
Ísu simásuwena séna keinárawate máyaunda póꞋa mináímbá íma simátímakeꞋa 5siꞋmákaiwainopaꞋa íyóndatavaiye séꞋa ívéꞋa simátímakaanaꞋa náávara iyónó séꞋa íma sísaa owaꞋá 6iyónaumne súnda-aimbo ísááwana tirunkó umbaí taisaꞋá póꞋa náávara iyónó séꞋa íma sísaa owe. 7áraiꞋa simátimeꞋa séꞋa ímo iyúndarakai kentí karááꞋá tutinkáníwaima íma kúmísino. iyéꞋa kwembá aiꞋmáráanana keinárawate kumbéna kaweꞋá umátinkaniye. 8kumbéna marapáꞋá máyáan-kwaasi kentí sáwí-imayaagona ááimba agaráátinkaniye. arupímo umáímo maígona ááimba agaráátinkaniye. Áánútumo aaivimbó maitinkáníwaina ááimba agaráátinkaniye. 9kesááiyavaimo ímo áraire síyawaiyavena simátimena séna kentí sáwí-imayaa úwoi kwáyáiye síníye. 10kesivonópaꞋa iyúnda íma suwánanaaomba póna kentí karááꞋá tutinkáníwaima arupí umái ménaaomba kunagaráátinkaniye. 11maambáráráꞋá sáwí-kawaanaꞋa áꞋa aaivimbá mayánkaraimba póna Áánútu aaivimbá maitinkáníyema simátiminimbaniye. 12sáwívar-aimba simátimusina umbai-áímbá póꞋa ívéꞋa íma kanaán-umai isánááomba póꞋa naaémba isánááowe. 13Áánútun-amankoma kumbéna amápa-tantaatavena árair-aama vaꞋmái simátiminiye. íma kwená imáyáavinkemba simátiminivo simámakain-aimba simátimena aánomo paárinin-tantaaꞋa simátiminiye. 14súnda-aimba simátiminana kesúwíꞋa anómba íníye. 15amápar-aintomba kesivondéímá mindá kendéímán-iye. miráumai séꞋa simámakaunda-aimba Áánútun-amankoma simátiminiye Ísu siráiye.tirumbá umbaí tamái naaémba kaweꞋá uráin-kwasai.
16Ísu simásuwena séna sáwíyankaꞋa íma suwánéꞋa aáno suwánanaaowe súwasa 17kwená kwayó-kwáásívínkémbá évakarawai sésa kesivonópaꞋa iyúnda póꞋa sáwíyankaꞋa íma suwánéꞋa aáno suwánanaaowemo simbá nóintavaiya kwésiyo. 18sáwíyankaremo simbá mináínkóná ááimba íya kwéisaumne. nóintavaiye séna kwésiyo suwaná 19Ísu miwí tuwánarena áísaa ónáe kwéuwana simátimena séna sáwíyankaꞋa íma suwánéꞋa aáno suwánanaaowemo súnda-aintaveꞋa keinárawaꞋa ávááraumai kemó súnda-aintaveꞋa ísámae kwénaaowe. 20áraiꞋa simátimeꞋa séꞋa keinárawaꞋa iviꞋá táíyasa marapá-kwáásí aamoí ónááombanivo kentirumbá umbaí tamái méꞋa naaémba kentirumbá etóyóí ónááowe. 21moórá-ininkomo iyámpóímo maránkarainda-kanaama tínanamo éna áíꞋo kwéuwanamo maránkaraintavaiye séna ísámai umbaí táínana naaémba miníyámpóí awánéna aamoí umánkaniye. 22mirá ontembá kentirumbá ísámai umbaí téꞋa naaémba suwánéꞋa aamoí ónááowe. aamoimó ií-yántááꞋá íma maitiyuwánááowe. 23minkánáá tínaꞋa íma sísaa ónááovo kesivombá áísaa íyamba kentávéꞋa ísámai áísaa íyantavena póna mirá umátinkaniye. 24kesivombá íma áísaa uráavo ívéꞋa kentávéꞋa ísámai áísaa íyamba mirá umátinkainana kentirunkó anómba aamoí ínaꞋa máéro Ísu siráiye.marapá-tántááꞋá Ísu usáyaaitaraiye siráin-kwasai.
25Ísu simásuwena séna kwántámai-aimba simátimunda póꞋa naaén-kanaama tínaꞋa kesivon-áái paárumai simátimenaumne. 26minkánáámó tínaꞋa kesí imáyáa ontáváí kesivombá áísaa íyaꞋa kemá íma áísaa onaná 27kwemá úwoi tiména kwenarumbá tímakaintavena póna úwoi timíníye. kentávéꞋa séꞋa Áánútunopakemba kunkáiye séꞋa tirumbá símakaantavena kesivomá arumbá tímakaiye. 28kesivonópakemba marapáꞋá kumbáyaunda póꞋa ívéꞋa marapáꞋá tuwéꞋa kesivonópaꞋa iyónaumne Ísu súwasa 29kwená kwayó-kwáásí sésa ívéꞋa íma kwántámai-aimpinkemba sémpo avoratá kwésimasimene. 30kesáámá séta áísaa ónáisaye íma súnayaama emá ísaraandanaꞋa po paárumai kwésene. miráyá séta Áánútunopakemba kunkáane kwésune suwaná 31Ísu séna kentávéꞋa Áánútunopakemba kunkáiye sembánivo 32sáwíyankaꞋa siyuwéꞋa kentí naaóꞋ-naoꞋa kóyáwé owaꞋá keyáá maúsina kesivomá kesé máyáiye. 33mináímbá simátimunda póꞋa kesé tarúmai méꞋa aánoumai kwempaꞋá máéro. marapá-kwáásí akáꞋáámba simátinkesa sáwíꞋa umátinkanaaombanivo marapá-tántáákwárá kwaásigwaraꞋa usáyaaitaraunda póꞋa kentirumbá aamoí umái ménaaowe Ísu siráiye.
Copyright information for
KZE